საქართველოს კონკურენციის ეროვნულმა სააგენტომ 2023 წლის 10 აპრილს დაასრულა შპს „საინჟინრო მონიტორინგის ჯგუფის“ 2022 წლის 13 ოქტომბრის საჩივრის საფუძველზე წარმოებული მოკვლევა, რომელიც ეხებოდა მარნეულის მუნიციპალიტეტის თვითმმართველი ორგანოსა (მარნეულის მუნიციპალიტეტის მერიის) და გორის მუნიციპალიტეტის მერიის მიერ „კონკურენციის შესახებ“ საქართველოს კანონის მე-10 მუხლის სავარაუდო დარღვევის ფაქტს.
მოკვლევის შედეგად დადასტურდა მოპასუხე ადმინისტრაციული ორგანოების მიერ „კონკურენციის შესახებ“ საქართველოს კანონის მე-10 მუხლის „გ“ ქვეპუნქტის დარღვევის ფაქტი. დარღვევა შეეხებოდა შესაბამისი მუნიციპალიტეტების ფარგლებში ინფრასტრუქტურული ობიექტების სამშენებლო სამუშაოებზე საზედამხედველო მომსახურების გაწევის მიზნით გამოცხადებულ სახელმწიფო შესყიდვის ფარგლებში კონკურენციის საწინააღმდეგო სატენდერო პირობების გამოყენებას, რაც ზღუდავდა ტენდერებში ეკონომიკური აგენტების მონაწილეობას.
ამასთან, მოკვლევის ფარგლებში გამოიკვეთა დამატებით ექვსი მუნიციპალიტეტის (ხაშურის, ქარელის, კასპის, დმანისის, გარდაბნის და წალკის) მიერ სახელმწიფო შესყიდვების პროცესში სადავო პირობის გამოყენების ფაქტი.
სააგენტოს მიერ მიღებული გადაწყვეტილების საფუძველზე, მოპასუხე ადმინისტრაციულ ორგანოებს, აგრეთვე, სახელმწიფო შემსყიდველ სხვა ორგანიზაციებს დაევალათ, სატენდერო პირობების ფორმირების პროცესში უზრუნველყონ კონკურენციის პრინციპის დაცვა, მათ შორის, არ გამოიყენონ სატენდერო პირობა, რომელიც სასამართლოს აქტის საფუძველზე მოქმედი აკრედიტაციის პირობებში მყოფ ეკონომიკურ აგენტს შეუზღუდავს ტენდერში მონაწილეობას, მის მიმართ აკრედიტაციის სტატუსთან დაკავშირებული სასამართლო დავის/პროცესის არსებობის მიზეზით.
საქართველოს კონკურენციის ეროვნულმა სააგენტომ 2023 წლის 13 მარტს დაასრულა ი/მ შოთა ლომინაშვილის, 2022 წლის 28 იანვრის, დაზუსტებული საჩივრის საფუძველზე წარმოებული მოკვლევა, რომელიც ეხებოდა სსიპ აკრედიტაციის ერთიანი ეროვნული ორგანოს - აკრედიტაციის ცენტრის მიერ „კონკურენციის შესახებ“ საქართველოს კანონის მე-10 მუხლის სავარაუდო დარღვევის ფაქტს.
მოკვლევის შედეგად დადასტურდა სსიპ აკრედიტაციის ერთიანი ეროვნული ორგანოს - აკრედიტაციის ცენტრის მიერ „კონკურენციის შესახებ“ საქართველოს კანონის მე-10 მუხლის „გ“ ქვეპუნქტის დარღვევის ფაქტი. დარღვევა შეეხებოდა აკრედიტაციისთვის საჭირო სამართლებრივი პროცედურების დაწყებასა და განხორციელებაზე აკრედიტაციის ცენტრის წერილობით უარს, რომელიც არ ეფუძნებოდა მოქმედ კანონმდებლობას და იწვევდა მომჩივანის ეკონომიკური საქმიანობის შეფერხებას.
სს „სადაზღვევო კომპანია ჯი პი აი ჰოლდინგის“ საჩივრის საფუძველზე, შპს „საქაერონავიგაციის“ მიერ „კონკურენციის შესახებ“ საქართველოს კანონის მე-10 მუხლის სავარაუდო დარღვევის ფაქტზე, სააგენტოს მიერ წარმოებული მოკვლევის შედეგად, დარღვევა არ დადასტურდა. საკითხი შეეხებოდა მოპასუხის მიერ ელექტრონული ტენდერის ფარგლებში, სატენდერო დოკუმენტაციაში ჩადებულ პირობებს - გადამზღვეველი კომპანიის დასტურის მოთხოვნასთან დაკავშირებით და ტენდერის იმგვარად გამოცხადებას, სადაც ერთ ლოტად იყო გაერთიანებული სამოქალაქო სამართლებრივი პასუხისმგებლობის, ქონების, თანამშრომელთა ჯანმრთელობისა და სიცოცხლის დაზღვევის მომსახურებები. სააგენტოს მიერ დარღვევა არ დადასტურდა, თუმცა, კონკურენტული გარემოს გაჯანსაღების მიზნით, მოპასუხეს მიეცა განსახილველად სავალდებულო რეკომენდაცია.
ი/მ შოთა ლომინაშვილმა საქართველოს კონკურენციის სააგენტოში შემოიტანა განცხადება, რომელიც ეხებოდა საქართველოს ეკონომიკისა და მდგრადი განვითარების სამინისტროს მიერ ჩატარებული ავტოსატრანსპორტო საშუალებების პერიოდული ტექნიკური ინსპექტირების ცენტრების შექმნის/მოწყობის შერჩევის პროცესის კონკურენციის კანონმდებლობასთან სავარაუდო შეუსაბამობის ფაქტს. მოკვლევის შედეგად საქართველოს ეკონომიკისა და მდგრადი განვითარების სამინისტროს დაუდგინდა დარღვევა და შესაბამის ბაზარზე კონკურენტული გარემოს გაჯანსაღების მიზნით მიეცა განსახილველად სავალდებულო რეკომენდაციები.
სადაზღვევო კომპანია „უნისონმა“ საქართველოს კონკურენციის სააგენტოში წარმოადგინა საჩივარი საქართველოს საავტომობილო გზების დეპარტამენტის მიერ კონკურენციის სავარაუდო შეზღუდვის ფაქტზე, რაც გამოიხატებოდა სახელმწიფო შესყიდვებში მხოლოდ ბანკების მიერ გაცემული წინასწარი ანგარიშსწორებისას გამოსაყენებელი საბანკო გარანტიების წარდგენის მოთხოვნაში. მოკვლევის შედეგად დადგინდა, რომ აღნიშნული პირობა ზღუდავდა სადაზღვევო კომპანიებს, საქართველოს საავტომობილო გზების დეპარტამენტს დაუდგინდა კანონის დარღვევა და დაევალა სახელმწიფო შესყიდვების პროცესში კონკურენციის კანონმდებლობის დაცვა.
შპს „ლიბომ“ საქართველოს კონკურენციის სააგენტოში წარმოადგინა საჩივარი ქალაქ ბათუმის მუნიციპალიტეტის მერიის მიერ კონკურენციის სავარაუდო შეზღუდვის ფაქტზე, აღნიშნული ეხებოდა ქ. ბათუმში გარე სარეკლამო საქმიანობის ნებართვის გაგრძელებასთან დაკავშირებულ საკითხებს. მოკვლევის შედეგად, ქალაქ ბათუმის მუნიციპალიტეტის მერიას დაუდგინა დარღვევა და დაევალა დარღვევის გამოსწორების მიზნით შესაბამისი ზომების გატარება.
სადაზღვევო კომპანია „უნისონმა“ კონკურენციის სააგენტოში წარმოადგინა საჩივარი შემსყიდველი ორგანიზაციების მიერ კონკურენციის სავარაუდო შეზღუდვის ფაქტზე, რაც გამოიხატებოდა სახელმწიფო შესყიდვებში მხოლოდ ბანკების მიერ გაცემული ხელშეკრულების შესრულების უზრუნველყოფის საბანკო გარანტიების წარდგენის მოთხოვნის გზით კონკურენციის კანონმდებლობის დარღვევასა და სადაზღვევო სექტორის შეზღუდვაში. მოკვლევის შედეგად, სსიპ საქართველოს მუნიციპალური განვითარების ფონდს, საქართველოს საავტომობილო გზების დეპარტამენტს, ქალაქ ბათუმის მუნიციპალიტეტის მერიას, ხაშურის მუნიციპალიტეტსა და ქალაქ თბილისის მუნიციპალიტეტის მერიას დაუდგინდათ კანონის დარღვევა და დაევალათ სახელმწიფო შესყიდვების პროცესში კონკურენციის კანონმდებლობის დაცვა.
სადაზღვევო კომპანია „უნისონმა“ კონკურენციის სააგენტოში წარმოადგინა განცხადება სსიპ „საქართველოს კომუნიკაციების ეროვნული კომისიის“, შპს „საქართველოს ფოსტისა“ და შპს „მთის კურორტების განვითარების კომპანიის“ მიერ კონკურენციის სავარაუდო შეზღუდვის ფაქტზე, რაც, გამოიხატებოდა ჯანმრთელობის დაზღვევის სახელმწიფო შესყიდვებში დისკრიმინაციული სატენდერო პირობების დაწესებაში (გამოცდილება მოზიდული პრემიის ოდენობა). მოკვლევის შედეგად, სადავო პირობები მიჩნეულ იქნა კონკურენციის შემზღუდველად, თუმცა, გამომდინარე იქიდან, რომ მოპასუხეები არ წარმოადგენენ „კონკურენციის შესახებ“ საქართველოს კანონის მე-10 მუხლის სუბიექტებს, მათ მიმართ არ დადგინდა კანონის დარღვევა.
ა(ა)იპ „ალიანსმა პროგრესული ჯანდაცვისათვის“ საქართველოს კონკურენციის სააგენტოში შემოიტანა განცხადება სსიპ - სამედიცინო საქმიანობის სახელმწიფო რეგულირების სააგენტოს მიერ კონკურენციის სავარაუდო შეზღუდვის ფაქტზე, რაც, განმცხადებლის პოზიციით, გამოიხატებოდა რეგულირების სააგენტოს მიერ სამედიცინო პრეპარატების ,,პარალელური იმპორტის“ (განსხვავებული შეფუთვა-მარკირებით იმპორტი) შეზღუდვაში. მოკვლევის შედეგად, რეგულირების სააგენტოს დაუდგინდა კანონის დარღვევა და დაევალა კანონსაწინააღმდეგო გადაწყვეტილების გაუქმება.
